Dy fëmijët e familjes Arifaj nga Komuna e Deçanit ditën e djeshme humbën jetën tragjikisht në Gjermani.

Të moshës 17 dhe 13-vjeçare, dy të rinjtë u goditën nga treni me shpejtësi të madhe, shkruan portali arbresh.info

E pranë tyre ishte edhe djali i tretë i familjes i cili e pa gjithë ngjarjen nga afër.

Tragjedia u shpalos edhe para syve të së ëmës e cila e pati të pamundur të bënte ndonjë gjë.

E gjithë familja ndodhet në gjendje shoku për shkak të tronditjes që pësuan nga kjo ngjarje që ka prekur tërë Kosovën.

Bazuar në informacionet e para, të dy të rinjtë po tentonin që të kapnin trenin i cili ishte në stacion, për këtë arsye të dy kishin vrapuar drejt shinave. Ata u goditën nga një tren që po vinte drejt Mynihut dhe lëndimet e marra ishin fatale pas goditjes.

“Ngjarja ka ndodhur në orën 7:30 të mëngjesit. Fëmijët kanë kaluar shiritin i cili ishte i vendosur në mënyrë që të kapin një tren, por një tjetër i cili ishte në anën e kundërt, ka ardhur dhe i ka shkelur. Me rastin tani po merret Policia”, tha oficeri i Policisë që është në vendin e ngjarjes.

Drejtuesi i trenit donte të fillonte një frenim emergjence, por ishte tepër vonë, tha zëdhënësi i policisë.

Dëshmitarë të shumtë okularë, përfshirë disa studentë të shkollës së mesme, vëzhguan aksidentin fatal.

Hasani e Bleriani do të sillen në Kosovë ku do të varrosen në Deçan./arbresh.info/